Espainiako Estatuko herritarrek badute zer hobetua nutrizio arloko osasunean, energia profil desorekatua dute eta gero eta bizimodu sedentarioagoa egiten dute
Honako hauek dira ohikoenak, INEren arabera: arteria hipertentsioa (%18), gerrialdeko minak (%17), kolesterol handia (%16), artrosia (%16), zerbikaletako oinazeak (%15) eta alergia (%13).
Horretaz gain, Espainiako herritarren nutrizio inkestak egiaztatu duenez (ENPE inkesta esaten zaio, eta 2015. urtean egin zuen EROSKI Fundazioak), 25 eta 64 urte arteko herritar helduen artean %39koa litzateke gehiegizko pisuaren prebalentzia, eta handiagoa gizonen artean (%46koa horietan eta %32koa emakumeetan). Bestalde, gizentasunaren prebalentzia globala %22koa da kalkuluen arabera, eta hori ere handiagoa da gizonetan (%23koa) emakumeetan baino (%20koa).
Dieta osasungaitzak egitea eta jarduera fisikorik ez gauzatzea dira arrisku nagusiak munduko herritarren osasunarentzat, halaxe nabarmendu du Osasunaren Mundu Erakundeak (OME). Ildo horretan, CEACCU kontsumitzaile elkarteak egindako txosten batek dio Espainiako herritarren elikadura kaskarragoa dela eta bizimodua sedentarioagoa (Los hábitos de los españoles en el cuidado de su salud izena du txostenak, Espainiarren ohiturak osasuna zaintzeko garaian). Are gehiago, ohartarazten du ondorio larriak ekar ditzakeela herritarrentzat (bereziki hirietakoentzat) dieta oso energetikoak egiteak, gantz saturatu eta karbohidrato findu ugarikoak, eta, gainera, bizimodu sedentarioa izateak.
Datu horiek guztiak aintzat hartuta eta osasunarekin zerikusia duten nazioarteko erakundeek zer esaten duten jakinda (herritarrek bazterrera utzi dituztela ohitura osasungarriak eta bizi kalitatea okertzen ari zaiela mantso-mantso), EROSKI CONSUMERek azterketa bat egin nahi izan du, jakiteko zein diren herritarrek dituzten ohitura osasungaitz horiek, beren osasunari hainbesteko kaltea egiten dietenak.
Horretarako, hainbat informazio iturritatik hartutako ikerlanak eta analisiak erabili ditu, honako erakunde hauenak hain zuzen: OME, INE, EROSKI Fundazioaren ENPE Azterketa, CEACCU, Nutrizioaren Espainiako Fundazioa (FEN), MAPAMA Espainiako Nekazaritza, Arrantza, Elikadura eta Ingurumen Ministerioaren Elikagai Kontsumoaren Panela, Familiako eta Komunitateko Medikuntzaren Kataluniako Elkartea (CAMFiC) eta Familiako eta Komunitateko Medikuntzaren Espainiako Elkartea (SemFYC).
Bada zer hobetua osasunean
FEN erakundearen Liburu Zuriak dio herritarrek asko hobetu dezaketela nutrizio arloko osasuna, eta zerrendatu egiten ditu ahulezia nagusiak:
- Gehiegizko pisuaren eta gizentasunaren prebalentzia handia, elikadura arloko jokabideen nahasmenduak, eta elikadurarekin zerikusia duten beste gaixotasun degeneratibo batzuk (bihotz-hodietako gaixotasuna, hipertentsioa, minbizia, diabetesa…).
- Jarduera fisikorik eza herritar multzo guztietan.
- Kopuru handietan jatea haragi gantzatsuak, hestebeteak eta azukre sinple ugariko elikagaiak, eta kopuru txikietan hartzea zerealak eta horien eratorriak, berdurak, barazkiak eta lekaleak.
- Kaloria profil desorekatua izatea eta ugari hartzea gantz azido saturatuak eta gatza.
- Zinka eta azido folikoa kopuru desegokietan hartzeko arriskua herritar askotan eta D bitamina ere bai 50 urtetik gorako pertsonetan.
- Herritarrek ezagutza txikia edo okerra izatea elikaduraren eta nutrizioaren inguruan, eta nutrizioari buruzko heziketa mugatua islatzea egungo hezkuntza legedietan.
Hori dela eta, CEACCUk nabarmentzen du oso garrantzitsua dela ohitura osasungarriak izatea, bestela gaixotasun kronikoak ager baitaitezke, adibidez gizentasuna, diabetesa edo bihotz-hodietako gaixotasuna (guztiak ere gorantz egiten ari dira gizarte aurreratuetako herritarren artean).
Honako hauek jotzen ditu ohitura osasungarritzat: egunean gutxienez 5 errazio fruta eta berdura hartzea, maiz samar jatea arraina eta lekaleak, gosaria ez hutsegitea, alkoholik ez edatea eta ez erretzea, jarduera fisikoa areagotzea eta lo orduak ere bai; eta, azkenik, inork ez hartzea bere kabuz medikuak agindu beharreko sendagaiak.
– See more at: http://revista.consumer.es/web/eu/20170401/actualidad/tema_de_portada/78806.php#sthash.oK2oLM24.dpuf